ဒီနေ့တော့ သီရိတို့မန္တလေးရဲ့ အစဉ်အလာကြီးမားတဲ့ သင်္ကြန်ပွဲတော်အကြောင်း ပြောပြချင်ပါတယ်။ သင်္ကြန်မှာ ခရီးထွက်ဖို့ ခဏခဏ စဉ်းစားဖူးပါတယ်။ ဒါပေမယ့်လည်း နောက်ဆုံး အဖြေကတော့ မသွားတော့ဘူး ဆိုတာချည်းပါပဲ။ သင်္ကြန် အကြိုနေ့ မရောက်ခင် ၂ရက်လောက် အလိုမှာဆိုရင် မန္တလေးမှာ ရေတွေ စပက် နေပါပြီ။ ကျုံးဘက် မသွားလိုက်နဲ့ သွားလိုက် လို့ကတော့ ရွှဲပြီး ပြန်လာပြီသာ မှတ်တော့။ သီရိတို့ ငယ်ငယ်ကတည်းက သင်္ကြန်ဆိုရင် အိမ်ရှေ့မှာ မဏ္ဍပ် ထိုးပြီး ရေပက်နေကျ ... ကလည်း ကနေကျပေါ့လေ။ အိမ်မှာက မိန်းကလေးက များတော့ အလုပ် ဖြစ်တာပေါ့ ... ကိုယ့်ညီအမ တစ်တွေပေါင်းပြီး ကတာနဲ့ ပွဲစည်နေပြီ..။
သီရိတို့ ညီမတွေ ဘယ်လောက် အကဝါသနာ ပါလည်းဆိုရင် ငယ်ငယ် ကတည်းက အိမ်မှာအကဆရာမခေါ်ပြီး အကသင်ခဲ့တာပါ။ မေမေတို့ ညီမ တစ်တွေ ကလည်း ဒါမျိုးတွေ ဝါသနာပါတော့ အဒေါ်တွေ အားလုံးကလည်း အားပေးတာပေါ့။ သီရိ ဆိုရင်လည်း လူကြီးတွေ မြောက်ပေးတိုင်း ကွေးနေအောင် ကခဲ့တဲ့သူပါ။ သင်္ကြန်မရောက်ခင် ၁လလောက် အလိုကတည်းက အိမ်မှာအကတိုက် နေကြပါပြီ။ နေ့တိုင်းညတိုင်း စိတ်ပါတဲ့အချိန်တိုင်း ထပြီးအကတိုက် ကြတာပါပဲ။ သင်္ကြန်ရောက်ဖို့ ၂ပတ်လောက် အလိုမှာဆိုရင် အိမ်ရှေ့မှာမဏ္ဍပ်စဆောက်ပါပြီ... အဲ့ဒီလိုအချိန်ဆို အရမ်းပျော်တာပေါ့ ၊ ညီမတွေ အားလုံးလည်းအရမ်းတက်ကြွနေပါပြီ။
အကြို့ အကြိုနေ့ မှာတော့ ကျုံးဘက်ကို သွားပြီး မဏ္ဍပ် ဘယ်နှစ်ခုရှိလည်း ဆိုတာ သွားကြည့်ပါတယ်။ ရေဘူးတွေ ယူသွားပြီး သူများတွေကို ရေလိုက်ပက်တဲ့ အလုပ်လည်း လုပ်ရင်းပေါ့လေ။ ကျုံးကို ဆိုင်ကယ်နဲ့တော့ တစ်ခါမှ မပတ်ဖူးပါဘူး… မေမေက ဘယ်တော့မှ မလွှတ်ဘူးလေ။ လူအရမ်းများပြီး အန္တရာယ်များလို့တဲ့ … သီရိက တစ်ခါလောက်တော့ ဆိုင်ကယ်တွေ အများကြီးနဲ့ အုပ်စုလိုက်ကြီး ကျုံးပတ် ကြည့်ချင်တာပေါ့လေ… မန္တလေးသူပဲဟာ။ ဘယ်တော့မှ မအောင်မြင်ပါဘူး ၊ နောက်ဆုံးကျရင် မေမေက မလွှတ်တာချည်းပါပဲ။
အကြိုနေ့ မနက်မှာတော့ အဒေါ်အပျိုကြီးရဲ့ ဦးဆောင်မှုနဲ့ မဟာမြတ်မုနိဘုရားကို အာရုဏ်မှာ သွားဖူးလေ့ရှိပါတယ်။ အရမ်းကို ကြည်နူးဖို့ ကောင်းပါတယ် … ဘုရားကြီးကို မနက် အစောကြီး သွားဖူးပြီး ရလိုက်တဲ့ ကြည်နူးမှုမျိုးက ဘာနဲ့မှမတူပါဘူး။ စိတ်က အရမ်း အေးချမ်းပြီးတော့ ကြည်လင် နေပါတယ်။ အဲ့ဒီလို အချိန်မျိုးကလည်း တစ်နှစ်မှ တစ်ခါပဲရနိုင်တာပါ (ခါတိုင်းဆို သီရိတို့က ဘယ်တော့မှ အိပ်ရာက မထနိုင်ဘူးလေ)။
ဘုရားက ပြန်လာတဲ့ အချိန်လောက်ဆို ရေမပက် ကြသေးပါဘူး။ အဲ့ဒီတော့ အေးအေး ဆေးဆေး လမ်းလျှောက်လို့ ရပါတယ်။ အကြိုနေ့ ညနေပိုင်းမှ စပြီး ရေပက် ကြပါတယ်။ တစ်ခါတစ်လေ တော့လည်း အကြိုနေ့ မနက်မှာ မြို့ထဲကို လျှောက်ပတ်ကြည့် ကြပါတယ်။ ကျုံးဘက်မှာဆိုရင်လည်း အကြိုနေ့ မနက်မှာ ရေမပက်ကြသေးပါဘူး။ ညနေပိုင်းမှ ဖွင့်ပွဲနဲ့ အတူတူ စပက်ကြတာပါ။ မနက်ပိုင်းမှာတော့ ရေပိုက်တွေဘာတွေ စမ်းကြတာပေါ့။
သီရိတို့ မန္တလေးရဲ့ ချစ်ဖို့ကောင်းတဲ့ အစဉ်အလာလေး တစ်ခုကတော့ စတုဒီသာ ကျွေးတာပါပဲ။ အရမ်းကို မြတ်နိုးစရာကောင်းတဲ့ အစဉ်အလာလေးပါ။ လူတန်းစား ခွဲခြားခြင်း ဆိုတဲ့ စကားလုံးက စတုဒီသာ ကျွေးမွေးတဲ့ နေရာမှာ လုံးဝကို ပျောက်သွား တာပါ။ ဆင်းရဲတဲ့ သူရော ချမ်းသာတဲ့ လူရော ဒီနေရာမှာ အားလုံး တူတူ စားကြ တာပါ။ ကျွေးမွေးတဲ့ ကုသိုလ်ရှင် ကလည်း ပီတိတွေ အပြည့်နဲ့ပေါ့။ စားတဲ့ လူတွေကလည်း လျှောက်လည်ပြီး ဗိုက်ဆာဆာ နဲ့ဆိုတော့ စားကြတာ အားရပါးရပေါ့။
မန္တလေးမှာက လျှောက်လည်ကြတဲ့သူတွေဆိုလည်း ညလုံးပေါက်လည်ကြတာပါ။ ညဆိုလည်း အိမ်မပြန်ကြပဲ ညကတဲ့မဏ္ဍပ်တွေကို လှည့်ကြည့်ကြပါတယ် - ဥပမာ ဈေးချိုသူတို့ ၊ မြို့တော်ဝန်မဏ္ဍပ်တို့ အများကြီးပါပဲ။ မနက်ကျရင်လည်း အစောကြီး ကတည်းက ကျုံးဘက်ကို တိုးတဲ့လူက တိုးနေကြပါပြီ။ သီရိတို့ ညီမတွေကတော့ လျှောက်လည် ရတာထက် အိမ်ရှေ့မှာ ရေပက်ရတာကို ပိုပြီး ပျော်ပါတယ်။ လျှောက်လည်ရင် အသားအရေအရမ်းပျက်စီးလို့ပါ… နောက်ပြီး ရန်လည်းများတယ်…အရမ်းလည်း ပင်ပန်းပါတယ်။
တစ်နှစ်တလေ တော့လည်း မဏ္ဍပ် မထိုးပဲ ရေပက်ခံ ထွက်ဖူး ပါတယ်။ ဒါပေမယ့် နေ့တိုင်းတော့ မလည်နိုင်ပါဘူး … နောက်ပြီး နေ့တိုင်း လည်နိုင်တဲ့ လူတွေ ကိုလည်း တော်တော်ကို ချီးကျူးပါတယ်။ သီရိတို့ မန္တလေးရဲ့ နောက် အစဉ်အလာ တစ်ခုကတော့ အတက်နေ့ ညနေပိုင်းမှာဆိုရင် ရေခဲရေနဲ့ပဲပက်ရမယ်လို့ စည်းကမ်းထုတ်ထားသလိုပါပဲ။ အတက်နေ့ညနေဆို ဘယ်နေရာမှာဖြစ်ဖြစ် ရေခဲရေနဲ့ ပက်ကြပါတယ်(ရေခဲရေဆိုတာလည်း အဖြစ်သဘောမဟုတ်ပါဘူး ၊ တကယ့်ကို အေးစက်နေတာပါ)။
တစ်ခွက်လောက် ထိပြီဆိုရင် နာရီဝက်လောက် အချမ်းပြေအောင် ခုန်နေပေတော့ ။ ခိုက်ခိုက် တုန်နေအောင် ချမ်းနေပြီမို့ အိမ်ပြန် ကြလား ဆိုတော့လည်း အဖြေက absolutely no ပါ ။ ညလုံးပေါက် မဏ္ဍပ်တွေ ကနေ သရွေ့ လည်တဲ့ ကားတွေလည်း ရှိနေပါတယ်။ သင်္ကြန်ပြီးသွားမှာကို မန္တလေးသူ မန္တလေးသားတွေက အရမ်းကြောက် ကြတာပါ။ သီရိတို့ ဆိုလည်း အဝတ်စိုစိုတွေ ကို မလဲပဲ ဒီတိုင်း ဆက်နေကြတယ်… သင်္ကြန်ကို ခဏအချိန်ဆွဲထားတဲ့ သဘောပေါ့။ သီရိတို့လည်း အတက်နေ့ဆိုရင် ည၁၁နာရီ လောက်ထိ ကျုံးဘက်မှာ နေတတ်ပါတယ်။ မဏ္ဍပ်ထိုးရင်တော့ ၁၂ကျော်ကျော်လောက်ထိ ကကြတုန်းပါ။
နောက်နေ့ မနက် မြန်မာနှစ်ဆန်း ၁ရက်နေ့မှာတော့ အိမ်ကို သန့်ရှင်းရေး ဝိုင်းလုပ်ကြ ၊ ပြီးတော့ မုန့်တစ်ခုခု လုပ်စားနေကြပါ။ ညနေပိုင်းလောက်ကျရင်တော့ ဦးပိန်တံတားကို သွားလည် ပါတယ်။ အဲ့ဒီမှာဆိုရင် သီရိတို့လို သင်္ကြန်ပိုး မသေသေးတဲ့ လူတွေ အများကြီးပါ… ရှိသမျှ အကြော်ဆိုင် တွေလည်း လူတွေအပြည့်ပါပဲ။ တံတားပေါ်မှာလည်း အရမ်းစည်ပါတယ်… တွေ့သမျှ လူတွေ ကလည်း အင်္ကျီအသစ်တွေ ဝတ်လို့ပေါ့။ အဲ့ဒီညနေခင်းလေးကို မကုန်ပါစေနဲ့လို့ ဆုတောင်းရင်း…
